Yanga wameonesha ubabe wao tena kwenye Ligi Kuu ya NBC baada ya kupata ushindi wa mabao 3-1 dhidi ya Namungo FC katika mchezo uliochezwa Uwanja wa KMC Complex.
Yanga ilianza kwa kasi ambapo Duke Abuya aliwafungia bao la mapema dakika ya 26 kupitia shambulizi la kushtukiza lililowaacha mabeki wa Namungo wakipoteana. Bao hilo liliwapa Wananchi matumaini ya mchezo mzuri.
Hata hivyo, Namungo walijibu kupitia Hassan Kabunda ambaye alisawazisha na kufanya mchezo kuwa sare ya 1-1 kabla ya mapumziko.
Okello aibeba Yanga kipindi cha pili
Kipindi cha pili kilikuwa cha nyota wa mchezo, Allan Okello, ambaye aliendelea kuonyesha makali yake ya ufungaji.
Dakika ya 53, Okello alifunga bao la pili la Yanga baada ya kumalizia mpira uliotemwa na kipa wa Namungo kufuatia krosi nzuri ya Prince Dube.
Baadaye, dakika ya 84, Okello alihitimisha kazi kwa bao la tatu baada ya kuwazidi ujanja mabeki wa Namungo ndani ya eneo la hatari.
Rekodi ya moto kwa Okello
Bao hilo limeifanya idadi ya mabao ya Okello kufika 11 msimu huu, akiwa nyuma ya kinara wa ufungaji Feisal Salum ambaye ana mabao 12.
Okello sasa amefunga katika mechi tano mfululizo, akifunga mabao mawili katika mechi nne za hivi karibuni.
Yanga warejea kileleni
Kwa ushindi huo, Yanga sasa wamerejea kileleni mwa msimamo wa ligi wakiwa na pointi 60 baada ya mechi 25, wakiendelea kujiimarisha kwenye mbio za ubingwa.
