Kocha wa FC Barcelona, Hansi Flick, ameripotiwa kutoa “green light” kwa uongozi wa klabu hiyo kuanza mchakato wa kumsajili kwa kudumu mshambuliaji wa Manchester United, Marcus Rashford, kufuatia ripoti za wataalamu wa masuala ya usajili barani Ulaya.
Kwa mujibu wa mwandishi wa masuala ya uhamisho Matteo Moretto, Flick anaamini Rashford anaweza kuwa sehemu muhimu ya mipango yake ya muda mrefu katika kikosi cha Barcelona, na ameidhinisha klabu kuendelea na mazungumzo rasmi na Manchester United.
Ripoti hizo zinaeleza kuwa Rashford mwenyewe anaonyesha nia ya kubaki Camp Nou, hata kama italazimu kukubali kupunguzwa kwa mshahara wake ili kurahisisha uhamisho huo kukamilika.
Vyanzo vya habari za michezo vinaeleza kuwa Barcelona sasa imeanza kuandaa mazungumzo mapya na Manchester United kuhusu masharti ya uhamisho huo, ikiwemo ada ya uhamisho na muundo wa malipo.
Hata hivyo, maamuzi ya mwisho bado hayajafikiwa, huku pande zote mbili zikijadili iwapo dili hilo litakuwa la ununuzi wa moja kwa moja au litahusisha mpango wa mkopo wenye kipengele cha kununua baadaye.
Rashford, ambaye kwa sasa ni miongoni mwa wachezaji muhimu katika kikosi cha England, ameendelea kuvutia vilabu kadhaa barani Ulaya kutokana na uwezo wake wa kucheza nafasi mbalimbali za ushambuliaji.
Barcelona inasemekana kumwona mchezaji huyo kama nyongeza muhimu katika safu yao ya mbele, hasa kutokana na uzoefu wake katika Ligi Kuu England na mashindano ya Ulaya.
Mazungumzo yanatarajiwa kuendelea katika wiki zijazo huku mashabiki wakisubiri kuona kama uhamisho huo mkubwa utakamilika au la.
