Watani wa jadi, Yanga SC na Simba SC, wanatarajiwa kumenyana leo Jumatano, Aprili 29, katika fainali ya Kombe la Muungano itakayopigwa katika Uwanja wa New Amaan Complex, visiwani Zanzibar, katika mchezo unaosubiriwa kwa hamu kubwa na mashabiki wa soka nchini.
Mchezo huo wa fainali unatarajiwa kuwa na ushindani mkali kati ya vigogo hao wawili wa soka la Tanzania, ambao wamekuwa wakionesha ubora mkubwa katika hatua zote za michuano hiyo kuelekea kilele cha mashindano.
Yanga SC waliingia fainali baada ya kuibuka na ushindi wa mabao 2-1 dhidi ya Azam FC katika nusu fainali iliyopigwa pia katika uwanja huo wa New Amaan Complex, huku Simba SC wao wakitinga fainali kufuatia ushindi mnono wa mabao 3-0 dhidi ya Mlandege FC.
Fainali hiyo inatarajiwa kuanza majira ya saa 2:15 usiku, na tayari maandalizi yamekamilika huku mashabiki wakitarajiwa kujitokeza kwa wingi kushuhudia pambano hilo la kihistoria.
Kwa mujibu wa taarifa rasmi, mchezo huo utachezeshwa na mwamuzi wa kimataifa kutoka Kenya, Dickens Mimisa Nyagrowa, mwenye umri wa miaka 33 na mwenye beji ya FIFA. Nyagrowa ana uzoefu mkubwa katika mashindano makubwa barani Afrika, akiwahi kuchezesha michuano ya AFCON pamoja na CHAN.
Mwamuzi huyo atasaidiwa na Ally Mbwana na Yusuph Shombe, wote kutoka Zanzibar, huku Ishaka Mwalile kutoka Tanzania Bara akiwa mwamuzi wa akiba.
Mashabiki wa soka wanatarajia mchezo wenye ushindani mkali, kutokana na historia ya upinzani mkubwa kati ya Yanga na Simba, ambapo kila timu inajivunia ubora na dhamira ya kutwaa ubingwa wa Kombe la Muungano msimu huu.
Uwanja wa New Amaan Complex unatarajiwa kujaa, huku Zanzibar ikigeuka kitovu cha burudani ya soka katika moja ya mechi kubwa zaidi za kalenda ya soka nchini.
