Kocha wa Manchester City, Pep Guardiola, amefunguka kuhusu falsafa yake ya kipekee ya kuwapa wachezaji mapumziko marefu, akiamini kuwa hatua hiyo ndiyo silaha muhimu katika mbio za kuwania mataji matatu msimu huu.
City wanaingia katika kipindi kigumu cha mwisho wa msimu wakiwa na matumaini ya kutwaa mataji matatu, baada ya kufuzu fainali ya FA Cup kufuatia ushindi dhidi ya Southampton. Hata hivyo, kabla ya kurejea uwanjani, Guardiola aliamua kuwapa wachezaji wake mapumziko ya siku chache, hatua inayozua mjadala lakini yenye mantiki kubwa kwake.
“Nendeni popote duniani” - Guardiola
Katika kauli yake ya kushangaza, Guardiola aliwaruhusu nyota wake kusafiri kokote wanakotaka duniani, mradi tu warejee kwa wakati kwa ajili ya mazoezi.
“Tuna siku nane kabla ya kucheza dhidi ya Everton. Wanaweza kufanya chochote wanachotaka. Kama wanataka kusafiri popote duniani, wako huru kabisa mradi warudi kwa mazoezi Jumatano alasiri,” alisema Guardiola.
Kocha huyo alisisitiza kuwa mapumziko hayo ni muhimu kwa afya ya akili na mwili wa wachezaji wake, hasa katika kipindi hiki cha mechi nyingi mfululizo.
Falsafa tofauti na makocha wengine
Guardiola alieleza kuwa amejifunza umuhimu wa mapumziko tangu alipofundisha nchini England, akipingana na mtazamo wa makocha wengi wanaoamini mazoezi ya mara kwa mara ndiyo ufunguo wa mafanikio.
“Makocha wengi wanaamini kadri unavyofundisha zaidi, ndivyo unavyokuwa bora. Mimi ni kinyume kabisa. Lazima ufanye mazoezi, lakini muhimu zaidi ni kufika siku ya mechi ukiwa safi,” aliongeza.
Kwa mtazamo wake, wachezaji waliopumzika vizuri hucheza kwa kiwango cha juu zaidi kuliko wale waliobanwa na ratiba ya mazoezi kila siku.
Ratiba ngumu yawasubiri
Baada ya mapumziko hayo, Manchester City wanatarajiwa kuingia kwenye ratiba ngumu yenye michezo sita ndani ya siku 21, ikiwa ni pamoja na mechi za Premier League na fainali ya FA Cup dhidi ya Chelsea FC.
Zaidi ya hayo, bado kuna michezo dhidi ya Bournemouth na Crystal Palace ambayo haijapangiwa tarehe rasmi, hali inayoongeza presha kwa kikosi hicho.
Guardiola ameweka wazi kuwa mafanikio yao yatategemea matumizi sahihi ya kikosi kizima, si wachezaji wachache tu.
“Ninahitaji kila mchezaji. Hatuwezi kucheza kila baada ya siku tatu na wachezaji wale wale. Kila mmoja lazima achukue nafasi yake,” alisisitiza.
