Kocha wa Manchester City, Pep Guardiola, amechukua uamuzi wa kuwapa wachezaji wake siku mbili kamili za mapumziko kabla ya mechi muhimu ya ligi dhidi ya Arsenal mwishoni mwa wiki.
Kwa mujibu wa ratiba ya mazoezi ya timu hiyo, baada ya mazoezi mepesi ya siku ya Jumatatu, wachezaji walipumzika kabisa Jumanne na Jumatano kabla ya kurejea kujiandaa kwa pambano hilo linalotarajiwa kuwa na ushindani mkubwa katika Premier League.
Hatua hiyo inaelezwa kuwa ni mkakati wa makusudi kutoka kwa Guardiola, anayesisitiza umuhimu wa wachezaji kuwa na akili na miili iliyo katika hali bora kabla ya mechi za maamuzi. Kocha huyo anaamini kuwa mapumziko ya kutosha yanaweza kuongeza nguvu, umakini na ubora wa kikosi siku ya mchezo.
Wakati City wakipata muda wa kupumzika, hali ni tofauti kwa Arsenal ambao wanatarajiwa kushuka dimbani kucheza mechi ya UEFA Champions League dhidi ya Sporting CP, hali inayoweza kuongeza uchovu kwa wachezaji wao kabla ya mchezo wao muhimu.
Tofauti hiyo ya maandalizi inaongeza mvuto wa pambano lijalo, ambapo City wanaonekana kuingia wakiwa na nguvu mpya na utulivu wa akili, huku Arsenal wakikabiliwa na changamoto ya ratiba ngumu.
Mchezo huo unatarajiwa kuwa na athari kubwa katika mbio za ubingwa, ukiwakutanisha vinara wa ligi dhidi ya mabingwa watetezi katika moja ya mechi muhimu zaidi za msimu.
