Paris Saint-Germain wameendelea kuthibitisha ubabe wao nchini Ufaransa baada ya kutwaa rasmi ubingwa wa Ligue 1 msimu wa 2025/26 kufuatia ushindi wa mabao 2-0 dhidi ya Lens usiku wa Jumatano, Mei 13, 2026.
Katika mchezo huo muhimu uliochezwa Stade Bollaert-Delelis, nyota wa kimataifa wa Georgia Khvicha Kvaratskhelia aliifungia PSG bao la kwanza dakika ya 29 kabla ya kinda Ibrahim Mbaye kuongeza la pili dakika za majeruhi na kuhitimisha ushindi huo muhimu.
Ushindi huo umeifanya PSG kufikisha pointi 76 kileleni mwa msimamo na kutwaa ubingwa huo huku wakisalia na mchezo mmoja mkononi. Lens walibaki nafasi ya pili na pointi 67, tofauti ambayo haiwezi kufikiwa tena.
Huu unakuwa ubingwa wa 14 wa Ligue 1 katika historia ya PSG, rekodi inayowafanya waendelee kuwa klabu yenye mataji mengi zaidi nchini Ufaransa. Pia ni mara ya tano mfululizo kwa miamba hiyo ya Paris kutwaa taji hilo.
Kocha Luis Enrique ameendelea kusifiwa kwa kuijenga PSG yenye ushindani mkubwa licha ya kuondoka kwa baadhi ya mastaa wakubwa katika miaka ya karibuni. Wachezaji kama Ousmane Dembélé, Warren Zaïre-Emery na Kvaratskhelia wamekuwa muhimu sana kwenye safari ya ubingwa msimu huu.
PSG sasa wanaelekeza nguvu zao kwenye fainali ya UEFA Champions League dhidi ya Arsenal huku wakisaka kumaliza msimu kwa mafanikio makubwa zaidi barani Ulaya.
