Klabu ya FC Barcelona imeandika historia katika Ligi Kuu ya Hispania (La Liga) msimu huu 2025/26 baada ya kumaliza msimu wa mechi za nyumbani bila kupoteza, hatua iliyoweka rekodi mpya ya kutokufungwa katika dimba lao la nyumbani.
Msimu huu, Barcelona chini ya kocha Hansi Flick wamefanikiwa kushinda mechi zote 19 za nyumbani bila kupoteza, hali iliyowafanya kuwa timu yenye uimara mkubwa zaidi nyumbani barani Ulaya.
Mfululizo huo wa matokeo umejengwa juu ya nidhamu ya kiufundi, uimara wa safu ya ulinzi pamoja na uwezo mkubwa wa ushambuliaji uliosheheni wachezaji kama Lamine Yamal, Robert Lewandowski, Raphinha, Pedri, Marcus Rashford, Ferran na Fermín López ambao wamekuwa nguzo muhimu katika mafanikio ya timu hiyo.
Barcelona pia wameonyesha ubora mkubwa wa kiufundi katika mechi zao za nyumbani, wakidhibiti michezo mingi kwa umiliki wa mpira na kutumia vyema nafasi wanazopata mbele ya lango la wapinzani wao.
Rekodi hii inatajwa kama mojawapo ya mafanikio makubwa ya klabu hiyo katika miaka ya hivi karibuni, huku ikiwapa nafasi ya kuendelea kuimarisha hadhi yao kama moja ya timu bora za soka barani Ulaya.
Mabingwa hao wa La Liga kwa misimu miwili mfululizo, wametangaza kumuongeza mkataba kocha Hansi Flick ambapo ataendelea kusalia Camp Nou hadi mwaka 2028.
