Timu ya taifa ya Ujerumani imeweka rekodi Kombe la Dunia 2026 baada ya kuifunga Curaçao mabao 7-1 katika mchezo wa Kundi E, na kuweka rekodi ya mabao mengi zaidi katika michuano ya mwaka huu.
Ushindi huo mkubwa uliifanya Ujerumani kufikisha mabao 239 katika historia ya Kombe la Dunia, ikiipiku Brazil iliyokuwa ikishikilia rekodi hiyo kwa miaka mingi.
Ujerumani ilianza mchezo kwa kasi baada ya Felix Nmecha kufunga bao la kuongoza dakika ya sita. Hata hivyo, Curaçao iliwashangaza wengi kwa kusawazisha kupitia Livano Comenencia dakika ya 21, bao ambalo pia liliingia kwenye historia kama bao la kwanza kabisa kwa taifa hilo katika fainali za Kombe la Dunia.
Baada ya kusawazishwa, Wajerumani waliongeza kasi na kuonyesha ubora wao mkubwa. Nico Schlotterbeck aliifungia timu yake bao la pili dakika ya 38 kabla ya Kai Havertz kufunga kwa mkwaju wa penalti mwishoni mwa kipindi cha kwanza.
Kipindi cha pili kilishuhudia Ujerumani ikiendelea kutawala mchezo. Jamal Musiala aliongeza bao la nne dakika ya 47, huku Nathaniel Brown, Deniz Undav na Havertz aliyefunga bao lake la pili wakihitimisha karamu ya mabao.
Mshambuliaji Kai Havertz alikuwa miongoni mwa nyota wa mchezo huo baada ya kufunga mabao mawili na kuiongoza safu ya ushambuliaji ya Ujerumani kwa kiwango cha juu.
Licha ya kupokea kipigo kizito, Curaçao ilijivunia kuweka rekodi ya kushiriki Kombe la Dunia kwa mara ya kwanza katika historia yake, huku bao la Comenencia likibaki kumbukumbu muhimu kwa taifa hilo la Caribbean.
Matokeo hayo yanaifanya Ujerumani kuongoza Kundi E kwa tofauti kubwa ya mabao, ikituma ujumbe mzito kwa timu nyingine zinazowania ubingwa wa Kombe la Dunia 2026.
Ujerumani itashuka tena dimbani Juni 20 kucheza dhidi ya Ivory Coast, wakati Curaçao itamenyana na Ecuador katika mechi nyingine ya kundi hilo.
